जितेन्द्र कुशवाहा 

महोत्तरी, फाल्गुन ८ गते ।

जनमत पार्टीका सबैभन्दा कान्छा उम्मेदवार बिरेन्द्र महतोले गौशाला नगरपालिका वडा नं. १२ मा आफ्नो घरदैलो अभियानलाई तीव्रता दिएका छन्। युवापुस्ताको प्रतिनिधित्व गर्दै चुनावी मैदानमा उत्रिएका महतो यतिबेला टोल–टोलमा पुगेर मतदातासँग प्रत्यक्ष संवाद गरिरहेका छन्।
घरदैलो अभियानका क्रममा उनले स्थानीय बासिन्दासँग हातेमालो गर्दै आशीर्वाद र समर्थन मागिरहेका छन्। मतदातासँग खुलेर संवाद गर्दै उनले देशमा अब पुरानो शैलीको राजनीति होइन, पारदर्शी, जवाफदेही र परिणाममुखी शासन आवश्यक रहेको धारणा राखेका छन्।
महतोले भने, “देशमा पटक–पटक पुराना अनुहारलाई जिताइयो, तर जनताको अवस्था जस्ताको तस्तै रह्यो। विकास निर्माणका काम अधुरा छन्, युवाहरू रोजगारीका लागि विदेशिन बाध्य छन्, शिक्षा र स्वास्थ्य सेवा सर्वसुलभ छैन। अब नयाँ सोच र नयाँ नेतृत्वको खाँचो छ।”
उनले भदौ २३ र २४ गते सम्पन्न आन्दोलनको स्मरण गर्दै उक्त आन्दोलनलाई देश परिवर्तनको ऐतिहासिक संकेतको रूपमा व्याख्या गरे। “त्यो आन्दोलन कुनै व्यक्ति वा दल विशेषका लागि थिएन, त्यो समग्र राष्ट्र परिवर्तनको आवाज थियो। जनताको चाहना परिवर्तन हो भन्ने सन्देश त्यसले दिएको छ,” उनले बताए।
महतोले अबको सरकार जेन्–जी (Gen Z) पुस्ताको सरकार हुनुपर्ने तर्क गर्दै युवाहरूले नेतृत्व सम्हाले मात्र देशलाई सही दिशामा अघि बढाउन सकिने विश्वास व्यक्त गरे। “हामी डिजिटल युगमा छौँ। अब नीति निर्माणदेखि कार्यान्वयनसम्म प्रविधिमैत्री, पारदर्शी र उत्तरदायी प्रणाली आवश्यक छ,” उनले जोड दिए।
उनले राजनीतिमा प्रवेश गर्नुको उद्देश्य स्पष्ट पार्दै भने, “म पदका लागि होइन, जिम्मेवारीका लागि राजनीतिमा आएको हुँ। जनताको सेवा, रोजगारीको सुनिश्चितता, गुणस्तरीय शिक्षा, सहज स्वास्थ्य सेवा र सुशासन स्थापना मेरो प्राथमिकता हो।”
घरदैलो अभियानका क्रममा स्थानीय बासिन्दाहरूले पनि सकारात्मक प्रतिक्रिया दिएका छन्। धेरै मतदाताले युवाको उम्मेदवारीलाई आशाको किरणका रूपमा हेरेका छन्। “अब नयाँ पुस्तालाई अवसर दिनुपर्छ, पुरानाले धेरै अवसर पाए,” एक स्थानीय मतदाताले प्रतिक्रिया दिए।
गौशाला क्षेत्रमा युवाहरूको उल्लेखनीय सहभागिता देखिएको छ। अभियानमा सहभागी युवाहरूले सामाजिक सञ्जालमार्फत पनि महतोको एजेन्डा प्रचार–प्रसार गरिरहेका छन्। यसले चुनावी माहोलमा नयाँ ऊर्जा थपिएको देखिन्छ।
अन्त्यमा उम्मेदवार महतोले भावुक हुँदै भने, “अब परिवर्तनको समय आएको छ। यो परिवर्तन जनताबाटै सम्भव छ। म जनताको साथ, विश्वास र आशीर्वाद लिएर अघि बढ्न चाहन्छु।”
यसरी जनमत पार्टीका युवा उम्मेदवार बिरेन्द्र महतोको घरदैलो अभियानले महोत्तरीको राजनीतिक माहोलमा नयाँ बहस र आशा जन्माएको देखिन्छ। अब मतदाताको निर्णयले आगामी राजनीतिक दिशा तय गर्नेछ।