निरन्जन कुमार साह 
महोत्तरी , पुष ६ गते   

महोत्तरीको गौशालामा इन्जिनियरिंग क्याम्पस संचालनको लागि गौशाला त्रिभुवन मा.वि. मा अनुगमन भएको छ ।

शुक्रबार राजर्षी जनक विश्व विद्यालयका अनुगमन टोली र नेपाल इन्जिनियरिंग काउन्सिलका टोलीले अनुगमन गरेका हुन् ।अनुगमनको क्रममा संचालन गर्न व्यवस्थापन सम्बन्धि छलफल समेत गरेका छन  ।

जसमा त्रिभुवन  मा.वि. का प्रधानाध्यापक बिनोद महतोले गौशालामा इन्जिनियारिंग क्याम्पस संचालन भएपछी विद्यार्थीहरुले स्थानीय स्तरबाटै आफ्नो शिक्षा पुरा गर्न सक्ने बताउनुभयो । उहाँले भन्नुभयो ,  "क्याम्पस संचालनमा जे जति सहयोग गर्नुपर्ने हुन्छ । म गर्न तयार रहेको छु ।"

अधिक प्रयास पछी इन्जिनियरिंग क्याम्पस गौशालामा संचालनमा आएको छ भने  तत्काल त्रिभुवन मा.वि. को नयाँ भवनमा पठनपाठन हुने राजर्षी जनक विश्व विद्यालयका सभासद प्रकाश पोखरेलले बताउनुभयो ।

गौशालामा शिक्षा सुधार गर्न गौशाला नगरपालिकाले अहम प्रयास गरिरहेको छ र पालिकाले गौशाला नगरपालिकालाई शिक्षाको हव बनाउने उद्देश्य  बोकेर कार्यहरु अगाडी बढाएको नगर प्रमुख डा. दिपेन्द्र महतोले बताउनुभयो । इन्जिनियरिंग क्याम्पसको संचालन हुनु गौशालाको लागि एउटा ठुलो उपलब्धि प्राप्त भएको उहाँको भनाइ थियो  ।

त्यस्तै नेपाल इन्जिनियरिंग काउन्सिलका उपाध्यक्ष ई. विकाश अधिकारिले मधेश प्रदेशको यो पहिलो इन्जिनियरिंग क्याम्पस भएकोले यसलाई व्यवस्थित बनाउन काउन्सिल प्रतिबद्धता रहेको बताउनुभयो । अबको शिक्षा गुणस्तरीय मात्र नभएर सिपमुलक बनाउनुपर्नेमा उहाँले जोड दिनुभयो भने शिक्षा जीवन निर्वाहको बाटो निर्माण गर्ने खालको हुनुपर्ने उहाँको भनाइ थियो ।

राजर्षी  जनक विश्व विद्यालयका रजिस्ट्रार सह- प्रधानाध्यापक सत्यनारायण साहले पुर्व शिक्षा विज्ञान तथा प्रविधि मन्त्री गिरिराज मणि पोखरेलको सपना आज क्याम्पस संचालन भएपछी पुरा भएको बताउनुभयो । यो क्याम्पसमा सिविल इन्जिनियरिंग ,रेल्वे इन्जिनियरिंग, इलेक्ट्रिकल इन्जिनियरिंगको पठन पाठन हुने भएको छ ।

राजर्षी जनक विश्व विद्यालयका उप - कुलपति तथा प्रधानाध्यापक अमर प्रसाद यादवले दिनरातको मेहनत पछीको यो सफलता प्राप्त भएको र यसलाई दिगो रुपमा लैजाने बताउनुभयो ।

कार्यक्रममा इन्जिनियरिंग क्याम्पसका प्रमुख रामदयाल यादवले क्याम्पसका योजनाहरु प्रोजेक्ट मार्फत दर्शाउदै कार्यक्रमलाई समापन गर्नुभएको थियो  ।

कार्यक्रममा इन्जिनियरिंग क्याम्पसका प्रमुख रामदयाल यादव , राजर्षी जनक विश्व विद्यालयका उप -कुलपति अमर प्रसाद यादव , रजिस्ट्रार सह- प्रधानाध्यापक सत्यनारायण साह ,सभासद प्रकाश पोखरेल , नेपाल इन्जिनियरिंग काउन्सिलका उपाध्यक्ष ई. विकाश अधिकारि ,  गौशाला नगरपालिकाका नगरप्रमुख डा. दिपेन्द्र महतो , अनेरास्ववियु (क्रान्तिकारी) का केन्द्रिय उपाध्यक्ष सूर्यनारायण साह , वडा न.५ को वडा अध्यक्ष ओम प्रकाश गुप्ता , त्रिभुवन मा.वि. को प्रधानाध्यापक विनोद कुमार महतो , व्यवस्थापन समितिका अध्यक्ष रमेश महतोको उपस्थिति रहेको थियो ।