गौशालामा इन्जिनियरिङ क्याम्पसको नव निर्मित भवन उद्घाटन

8 महीना पहिले प्रकाशित

(2082-10-28 B.S.)

531 पटक देखिएको

जितेन्द्र कुशवाहा
महोत्तरी, माघ २८ गते ।

गौशाला नगरपालिका वडा नं. १, सुर्तिविकास स्थित गौशाला इन्जिनियरिङ क्याम्पसको नव निर्मित भवनको उद्घाटन सम्पन्न भएको छ। उक्त भवनको उद्घाटन गौशालाका नगरप्रमुख डा. दिपेन्द्र महतोले गर्नुभएको हो।

उद्घाटन समारोहलाई सम्बोधन गर्दै मेयर महतोले प्राविधिक शिक्षाको विकास समयको आवश्यकता भएको बताउनुभयो। उहाँले गौशालामा इन्जिनियरिङ क्याम्पस स्थापना हुनु नगरका लागि ऐतिहासिक उपलब्धि भएको उल्लेख गर्दै यसले स्थानीय स्तरमै गुणस्तरीय प्राविधिक शिक्षा हासिल गर्ने अवसर सिर्जना गरेको धारणा राख्नुभयो।

मेयर महतोले यस क्याम्पसले स्थानीय विद्यार्थीहरूलाई आफ्नै क्षेत्रमा इन्जिनियरिङ अध्ययन गर्ने अवसर प्रदान गर्ने विश्वास व्यक्त गर्नुभयो। “शिक्षामा गरिएको लगानी नै दीर्घकालीन विकासको आधार हो,” उहाँले भन्नुभयो, “दक्ष जनशक्ति उत्पादनले मात्रै नगर र राष्ट्रको समृद्धि सम्भव हुन्छ।”

क्याम्पसको समुचित सञ्चालनका लागि नगरपालिका सधैं सकारात्मक र सहयोगी रहने प्रतिबद्धता जनाउँदै उहाँले विद्यार्थीहरूलाई अनुशासन, लगनशीलता र मेहनतका साथ अध्ययन गरी दक्ष इन्जिनियर बनेर राष्ट्र निर्माणमा योगदान दिन आग्रह गर्नुभयो।

कार्यक्रममा प्रोफेसर डा. श्री अमरप्रसाद यादव, राजर्षि जनक विश्वविद्यालयका संस्थापक रजिस्ट्रार श्री महेन्द्रप्रसाद यादव, राजर्षि जनक विश्वविद्यालय विज्ञान, प्रविधि तथा इन्जिनियरिङ संकायका डिन डा. अजयकुमार झा लगायत विभिन्न राजनीतिक दलका प्रतिनिधि, शिक्षाविद्, अभिभावक तथा विद्यार्थीहरूको उल्लेखनीय उपस्थिति रहेको थियो।