महोत्तरी , साउन २७ गते

टियुले हालै बिएड प्रथम वर्ष (२०८०) को परिक्षाफल प्रकाशन गरेको छ । महोत्तरीको गौशाला नगरपालिका स्थित रहेको गौशाला बहुमुखी क्याम्पसमा बिएड प्रथम वर्ष (२०८०) परिक्षामा जम्मा एक जना विद्यार्थी मात्र पास भएपछी जनसमुदायमा आलोचना बढेको छ ।  क्याम्पसमा बिएडमा अध्ययनरत २० जना विद्यार्थीमध्य १ जना विद्यार्थी मात्र पास भएकी छिन् ।

अनेकौ प्रयासपछी  गौशाला नगरपालिकाको लगानीमा संचालनमा आएको क्याम्पसमा परिक्षामा एकजना  बाहेक सबै विद्यार्थी फेल भएपछी क्याम्पसको शैक्षिक गुणस्तरमाथि प्रश्न खडा भएको छ । कतिपय स्थानीयले गौशाला नगरपालिकाले शिक्षामा गरेको लगानी सबै खेर गएको समेत टिप्पणी गरिरहेका छन् । विशिष्ट तथा अनुभवी शिक्षकहरुद्वारा पठनपाठन हुँदा समेत परिक्षामा आएको यस्तो नजिताले शिक्षकमा पनि कमजोरी देखिएको प्रस्ट भएको छ ।

क्याम्पसमा उचित व्यवस्थापनको कमिको कारणले यस्तो नजिता आएको गौशाला -५ का एक शिक्षकले बताए । उनले कक्षाकोठाभित्र उपलब्धिमुलक सिकाई नहुँदा र पाठ्यक्रमको उद्देश्यअनुसार पठनपाठन नहुँदा विद्यार्थी फेल हुने गर्छन भन्ने कुरा व्यक्त गरे । उनि भन्छन् , “रिटायर भइसकेको व्यक्ति गौशाला बहुमुखी क्याम्पसको प्रधानाध्यापक छन् । जबकि क्याम्पस चलाउनको लागि एक योग्य व्यक्तिलाई जिम्मा दिनुपर्ने थियो । तर त्यसो भएन । त्यति मात्र नभएर यसमा शिक्षकहरु पनि उत्तिकै दोषी छन् । शिक्षकको प्रस्तुति पनि कमजोर छ भन्ने नतिजाले देखाएको छ । नत्र यति धेरै विद्यार्थी फेल हुने थिएनन् ।

पछिल्लो समय परिक्षामा चोरीको प्रवृत्ति बढेपछी टियुले परिक्षाको मुल्यांकनमा कडाइ गरेको महसुस भएको सोहि क्याम्पसमा अध्ययनरत विद्यार्थी गौशाला -८ फुलकाहाकी निभा यादवको भनाई छ । यसपाली टियुको नतिजा प्रभावकारी आएको छ , उनले भनिन् , “ चोरीको भरमा पास हुन खोज्ने परीक्षार्थीहरुलाई टियुले यसपाली राम्रो सबक सिकाएको छ । शिक्षकको लापरवाही पनि छर्लंग भएको छ। क्याम्पसमा पहिलो वर्षमा पठनपाठन राम्ररी भएन । यसपाली पनि राम्ररी पढाइ भाको छैन । पहिलो वर्षको बिएड परीक्षामा एक जना बाहेक सबै जना फेल भए । क्याम्पसले लिएको त्रैमासिक परिक्षामा बिबिएस तिरका पनि १/२ जना बाहेक सबै जना फेल नै भएका थिए । अब अन्तिम परिक्षाको नजिता पनि राम्रो आउला जस्तो छैन ।”

साथै उनले क्याम्पसको कुनै पनि शिक्षकको पढाइ प्रभाकारी नभएको र समयमा शिक्षकहरु नआउने , प्रायजसो बिदामा बस्ने गरेको गुनासो गरिन् । अझै राम्ररी क्याम्पसको व्यवस्थापन र कडाइका साथ्  शिक्षकहरुले नियम अनुसार पठनपाठन भएमा मात्र क्याम्पसको शिक्षा राम्रो हुन सक्ने उनको भनाइ छ ।

असन्तुष्टिजनक नजिता सार्वजनिक भएपछी गौशाला नगरपालिकाले यसतिर विशेष ध्यानदिनुपर्ने र समयमै क्याम्पसको शैक्षिक अवस्था सुधार गर्नुपर्ने तथा व्यवस्थित गर्नुपर्ने स्थानीयहरुको भनाई छ ।

क्याम्पसमा १० जना शिक्षक रहेका छन भने ४ जना कर्मचारी छन् । त्यस्तै बिबिएस प्रथम वर्षमा हाल  ६२ जना दोश्रो वर्षमा ३५ जना छात्रछात्रा अध्ययनरत रहेका छन् । बिएड प्रथम वर्षमा १६ जना विद्यार्थी छन् ।